Friday, March 14, 2014

Burat, pinauranan nin bala an PNP outpost

CIUDAD NIN NAGADinakop an sarong lalaki pakatapos kaini pauranan nin bala an Outpost No. 4 kan Philippine National Police (PNP) sa barangay Triangulo sa ciudad na ini kasubanggi.

Binisto an suspechado na si Mariano Sumayao, 31 anyos, asin residente kan Milaor.

An suspechado, segun sa report, nakasakay sa sarong tricycle na pigmamaneho ni Rodelio Rocafor, 36, asin taga-Calabanga. Pagtungod kaini sa nasambit na outpost, nagparapaputok siya kan saiyang badil sa mga pulis. Nagderecho an tricycle pasiring sa Milaor.

Mientrastanto, an mga pulis nagradyo sa Mabolo checkpoint manungod sa insidente.

Tulos man na pinagbagat an tricycle kan ini makaabot sa parte kan checkpoint tanganing aprehederon an suspechado.

Kan madakop si Sumayao, nadiscubre na ini palan burat-burat asin nagsasayasay pa an paglakaw.

Nakua sa poder kan suspechado an sarong calibre .38ng badil na may laog na duwang bala. Sa imbestigasyon, napag-araman na an badil hinabonan suboot hale sa sarong security guard kan Starmark Royale.

Sa entrevista man sa driver, sinabi kaini na nakubanan siyang maray sa nangyari. Suboot, dai niya aram na an saiyang pasahero may darang badil. Sinabi pa kaini na pig-arkila sana an saiyang tricycle sa kantidad na 50 pesos tanganing ihatod an pasahero hale sa Diversion Road pasiring sa Milaor.

Linalaoman na nagkapirang reklamo an aatubangon kan nasambit na suspechado, na sa presente detenido sa Naga City Jail. (Report ni Boyet Paderes/BBS-DWLV)

Bicol Standard on Twitter
Bicol Standard on Facebook
Bicol Standard on Youtube
Bicol Standard on Instagram
Bicol Standard on Google+
Bicol Standard on Pinterest
Share:

Featured Post

Post-fiesta cleanup in Naga City

MASSIVE CLEAN-UP. City Hall employees and other participating agencies and volunteers led the Post-Peñafrancia Clean-up Activity yesterday...