Monday, February 3, 2014

Lalaking hugakon, sinaksak kan agom

Lalaking hugakon, sinaksak kan agom
Lalaking hugakon, sinaksak kan agom
by Oscar Esmenda

GOA, CSUR — Huslaon. Turognon. Pabaya.

Ini an tulong simpleng mga tataramon na pwedeng iyong naging mitsa sa nag aaso-asong  kaanggutan kan agom na babae sa saiyang esposo.

Sa nagunong informasyon, sarong may ngaran na Eddie Flores kan Sitio Bagong Sirang,  Cagaycay, an mantang nanok sa pagturog sa saindang residencia, an sinaksak nin “palas” (sarong klaseng mapanas asin matarom na sundang) kan suspechadong si Edna Flores, saiyang esposa.

Huli sa makuring tama sa may parteng  tulak kan victima, idinalagan ini sa Goa Municipal Infirmary, asin dinerecho sa hospital sa Ciudad nin Naga.

An pagsaksak, dinara sa atensyon kan pulis ni Brgy Kag. Nolito Delfino, na nagtuyo sa Goa Police Station, para paisihon kan nangyaring incidente.

Tulos nag-ayuda an mga awtoridad, asin nagdespachar nin mga pulis sa pamamayo ni SPO1 Vincent Picaso, PO3 Herbert Tranquilino, PO2 Alain Abundabar, PO2 Aldin Buentiempo asin PO1 Richard Corpuz.

Sinda gabos yaon sa lindong kan supervisyon ni Police Chief Inspector Chito Oyardo.

An krimen nangyari poco mas o menos ala una y media nin hapon, sa residencia mismo ninda.

An suspechado na naarestar sa saindang harong dinara tulos sa hepatura kan police para sangatan nin reklamo.

Ipinahayag kan mga awtoridad na ipinaintiende man ninda sa suspechado an saiyang derecho sa lindong kan Constitusyon.

Mientrastanto, nagluluwas na nagkakalakagang kapungotan an sinasapo kan familiang ini, huli suboot sa kakulangan financial sa saindang masakit na pagbuhay.

Nagluluwas na dae na kinaya kan esposa na pagpara-mansayan sana an sinasapo nindang pag tios, na mayo man lamang nin ginigibong esfuersos an lalaki, sabi pa sa report.

Sa parte kan suspechadong esposa, naghihibi ining nagsabi na pasado ala una na nin hapon, kan aldaw na mangyari an krimen, pero dae pa nin pangodtohan an walo (8) niyang mga saradit pang
aki, kan suboot masalimbadan niya an saiyang agom na nanok sana sa pag turog.

Pirang beses na suboot sindang nag-iiriwal huli sa mayong pagkakan. Pero, mayo lamang nin ginigibong pag hingowa an agom.

An siring na pangyayari an nagtulod saiyang tusokon nin palas an lalaki, mantang nandidiklom an saiyang pagheling.
Share:

Featured Post

Post-fiesta cleanup in Naga City

MASSIVE CLEAN-UP. City Hall employees and other participating agencies and volunteers led the Post-PeƱafrancia Clean-up Activity yesterday...