Saturday, February 15, 2014

San Jose Bridge sa CamSur, sasaradohan na ngonian, alas 7 nin aga

Gigibohon poon ngonian an sarong semanang experiment kan Department of Public Works and Highways (DPWH) sa pagsirado kan San Jose bridge sa Pili.

An nasambit na tulay importanteng marhay huli ta ini an mayor na agihan kan mga viaje paluwas asin palaog sa Naga.

Sabi kan DPWH, sainda ngonang pagmamasidan an dalagan kan mga vehiculo, orog nang nagkapira an itinagamang lugar para sa pag-reroute kan mga viaje.

An mga hale sa Manila na viaje pwede nang mag-agi sa tinampo sa Grijalvo, San Fernando; maluwas sa Antipolo, Hobo, Magadap sa Minalabac. Derecho na man ini sa barangay Sto Nino, Ombao Hieghts, Panoypoyan, Bula.

Pede man sindang magderecho na sa Nabua, o kun dae, pwede man na mag luwas sa Pawili, Pili.

Saro pa sa mga alternatibong rota iyo  na an viajeng hale sa Manila palaog  sa Naga. Pwede nang mag laog sa banwaan kan Milaor, dagos sa poblacion kan Minalabac, Malitbog, Manapao, Mataoroc asin maluwas na sa San Vicente, Pili.

Kan sarong aldaw nagkaigwa na nin meeting an mga oficiales kan mga banwaan na afectado kan re-routing, arog kan Pili, Milaor, Minalabac asin Bula, para adalan an pinakamaray na solusyon kan pinagbabana-banang mabungkaras na problema.

An repair kan San Jose Bridge sa Pili linalaoman na madurar nin duwang taon.

En coneccion kan baretang ini, si alcalde Rolando Canet kan Bula, nangapodan liwat sa mga nanonongdan, orog na sa DPWH, na reparohon an “alternate route,” na mabaktas sa saindang lugar.

Ini sa rason na halawig na parte kan saindang tinampo sa Bula an aspaltado sana, asin seguradong marurugado ini sa pag agi kan mga magagabat na vehiculo.

Si alcalde Nonoy San Luis kan Pili, sa ibong na lado, nagpahayag na binabantayan man ninda an siring na problema, huli ta an saindang banwaan masapo man nin dakulang inconveniencia.


Sa gigibohon na rerouting, pwede pa man gamiton kan mga saradit o bakong magagabat na vehiculo an kataed na tulay kan San Jose bridge.

Bicol Standard on Twitter
Bicol Standard on Facebook
Bicol Standard on Youtube
Bicol Standard on Google+
Bicol Standard on Pinterest
Share:

Featured Post

Quack dentist arrested in Naga City

Photo courtesy of Dr. Albeus NAGA CITY (Bicol Standard) – A person believed to be a quack dentist was arrested by authorities as he was...