Thursday, February 13, 2014

Nakitagbuan sa motel, dikit pang ma-carcel

BICOL STANDARD Nakitagbuan sa motel, dikit pang ma-carcel
Nakitagbuan sa motel, dikit pang ma-carcel
CIUDAD NIN NAGA – Sa pagmawot na maenot sa pagcelebrar kan aldaw nin mga puso o Valentine’s day, an mag-ilusyon na sinda Glenda* asin Roel* an nakaisip na magpalipas oras sa sarong motel sa may salog kan ciudad na ini para  namnamon an init kan liputok nindang pagkamoot sa lambang saro.

Hapon na kan sarong aldaw kan magkasundo an nagkakaminootan na namitan an saindang nag aarab-adab na emosyon, na an gatong iyo an saindang pungaw, huli ta pambihira sanang magkadootan an saindang mga lawas asin daghan.

Si Glenda an nagsadol ki Roel na mag-eskusar nin maski dikit sanang kantidad para makalaog sa sadit na cuarto sa sarong motel.

Pag-amba pa sana sa puerta kan saindang dadagosan na lugar, nag-orog an kurab-kutab kan daghan kan daraga, sa pag malisya na kulang palan an darang sentimos kan saiyang kaibahan.

Tanganing dae na maabala sa paglaog sa cuarto, hinapot kan babae kun gurano an tulong oras na pag-usar kan lugar.

Sinimbag siya kan bantay sa “front desk” na dapat magbayad na kan kantidad na P350.00 sa paglaog pa sana. Nin huli ta bilong an saiyang cuartang P500.00, itinao niya ini sa nagbabantay sa kasunduan na hahapiton na sana an uli, kun sinda magluwas na.

Naging maogmang marhay an ibahan kan mag-ilusyon sa laog kan mga oras asin minutos na nagtener sinda sa laog kan cuarto sa motel.

Alagad, kan mag luwas na, dakulang problema an nangyari.

An dating bantay na winalatan kan bilog na P500.00 mayo na asin an bagong bantay iyo na an nasa counter kan motel.

Sa paghidale kan duwa, tanganing mayong makabisto sainda, dali-daling hinagad ni Glenda an uli saiya na kantidad P150.00.

Mayong ikinatao an bantay, mantang mayo man nin kapot na recibo an daraga.

Nagkalintar si Glenda, asin huli kaini nahulog sa pagguronitan nin buhok an duwa (si Glenda asin an bantay).

Dae kayang sawayon kan lalaki an nangyaring dakulang eskandalo na orog pang nag grabe kan magparakuragrit an bantay. Siya daa nagkagarabotan na nin buhok sa payo.

An nobyo nin Glenda nagpatuyatoy na naghale, huli ta habo na makasapog sa eskandalo.

Nagluluwas na an lalaki igwa na palan nin familia.

An problema dinara kan nagrereklamong babae sa women’s desk kan pulis.

An desk clerk naaraman na ma-plantear man siya nin suway na reklamo huli ta nakulgan siya asin nasupog na maray.

Gusto kan desk clerk na ipalangob sa carcel an naggunit saiya.

Mientrastanto, an nobyo duminolag na, asin padagos pang hinahanap kan saiyang kaibanan.

(*An mga pangaran rinibayan sa report na ini rinibayan tanganing  maprotehiran an saindang persona.)

Bicol Standard on Twitter
Bicol Standard on Facebook
Bicol Standard on Youtube
Bicol Standard on Google+
Bicol Standard on Pinterest
Share:

Featured Post

Quack dentist arrested in Naga City

Photo courtesy of Dr. Albeus NAGA CITY (Bicol Standard) – A person believed to be a quack dentist was arrested by authorities as he was...