Tuesday, February 4, 2014

Dating CAGFU gadan, 4 na pag-iriba irido, sa pagbuag nin granada

Bato explosion
PHOTO BY OSCAR ESMENDA/BICOL STANDARD
by Oscar Esmenda

BATO, CSur – Sarong dating miembro kan Civilian Armed Forces Geographical Unit (CAFGU) sa banwaan na ini an nagadan kan masabogan nin sagrong bala para sa M203 na granada.

Segun sa pahayag ni Police Officer Marnelle Intia, an parataram kan police digdi, an nagadan iyo si Efren Bagasala, Jr.

Afuera saiya, apat (4) pang persona an igwa man nin mga lugad sa nangyaring incidente kan Martes na mag-omagahon, poco mas o menos alas 12:15.

An incidente nangyari sa atubangan kan residencia kan victima, sa highway sa barangay Santiago.

Nagluluwas sa report kan pulis na mantang nag-iirinoman an grupo kan mag-aramigong sinda Efren Bagasala, Jr., Elisa Sabirola, Ronnel Rumaraog, John Paul Paran asin Christian Magalona, biglang nagbuag an makusog na putok, na nadiskubreng hale suboot sa bala kan M203.

PHOTOS: Blast in Bato, Camarines Sur

Mientrastanto, sa intrevista kan police ki Elisa Sabirola, saiyang ipinahayag na mantang naghaharampangan an saindang grupo, ilinuwas ni Bagasala, Jr., an saiyang darang granada na bala para sa M203.

Sa tahaw kan kaorogmahan, kinua ni Ronnel Rumaraog an darang granada asin pig bibirik-birik an sarong parte kaini.

Huli sa pag hadit na baad magputok inagaw suboot ni Bagasala sa nagsusubang si Rumaraog an granada, asin ipinaipit sa garter kan saiyang short pants.

Dahil sa bakong pusog an pagkaipit sa garter, nahulog ini, asin dagos nang nagbuag.

Sa estorya kan magurang kan victima, sinabi sa mga awtoridad na pirmeng dara kan victima an granada sa saiyang paglakaw, bilang pagpaseguro sa saiyang buhay.

Pirang beses na man suboot na hinahagad kuta kan magurang an granada para i-suko sa mga awtoridad, alagad, habo ining itao.

Ipinahayag ni Intia na an mga kairinoman ni Bagasala, Jr. na sinda Sabirola, Rumaraog, Paran asin Magalona, dinara man tulos sa Rinconada Medical Center sa Ciudad kan Iriga para bulongon.

An pulis nagsisiyasat pa kun an bala kan M203 dara ni Bagasala.
Share:

Featured Post

Mayor Bongat clarifies Emergency Shelter Assistance status in Naga City

NAGA CITY (Bicol Standard) – Hounded by incessant follow-ups on the release of the Emergency Shelter Assistance (ESA) for victims of 20...