Wednesday, February 5, 2014

UN kinondenar an polisiya kan Vatican manungod sa mga caso nin panlulugos kan mga padi sa mga aki

United Nations
United Nations

Malanit an naging pahayag kan United Nations (UN) manungod sa tratamiento kan Vatican sa mga caso nin panlulugos  kan mga miembro kan simbahan sa mga kaakian.

Segun sa report kan UN Committee on the Rights of the Child (CRC), dahil sa polisiyang pinapaotob kan Vatican, rinibong mga aki an naging biktima asin padagos na nagsasapo nin pangmomolestiya kan mga clerigo.

Tinuyaw kan comite an sistema kan simbahan na pagbalyo sana kan destino kan mga padi na sinasahutan nin panlulugos asin pangmomolestiya.

Inangat kan nasabing UN watchdog na tulus-tulos haklason sa serbisyo an gabos na padi na imbuelto o pigsusupechahan na nang-aabuso nin mga kaakian.

Dagdag pa kan komite, panahon nang iluwas kan simbahan sa publico an mga pangaran kan mga nagtabang na itago an mga panlulugos sa mga kaakian, imbes na depensahan pa an mga ini.

Mientrastanto, nagforma naman an Vatican nin komitiba tanganing matawan solusyon an nakakaalarmang problemang ini.

Inaasahan na ano mang oras, maluwas nin pormal na pahayag an Vatican manunggod sa kontrobersyal na UN report.
Share:

Featured Post

Bicol PNP nabs 2,701 in anti-illegal gambling ops

LEGAZPI CITY -- For the past three quarters covering the period from January-September this year, a total of 1,079 positive illegal gam...