Wednesday, January 29, 2014

Mga parasalakat dakop sa Pasacao, positibo man sa paggamit druga

PASACAO, CSUR — Reklamong  robbery (pagsalakat) asin pag lapas sa Republic Act 9165 (Dangerous Drugs Act) an isinangat kontra ki Kenneth Castillo y Briosa; Jerome Magtarayo y Reviro asin Arvin Bolante y Espares sa opisina kan Procurador Provincial.

Sa sumbong  ni Nancy Ilao kan Brgy. Sta Rosa del Sur, saiyang itinukdo an nasambit na mga persona na iyo suboot an nagsalakat sa saiyang harong kan fecha 26 ngonian na bulan.

An mga miembros kan Pasacao PNP na iyong naggibo kan pag siyasat nagkua kan pahayag ni Ilao na poco mas o menos alas cuatro (4:00) nin amay na pagkaaga, kan nasambit na aldaw, na namalesyahan niya na bukas na an saindang bintana mantang siya pasiring sa toilet.

Kan siya magdungaw sa bintana, naheling niya an dae niya bistong tawo na nagdadalagan parayo sa saindang harong. Malinaw suboot na naheling kan nagrereklamo na an saro sa duwang lalaki nakasulot nin azul na kamisedentro, mantang an saro kolor itom an sulot na T-shirt. An saro pang lalaki, na naheling niya, iyo si Arvin Bolante, na iyo an nagsirbeng “lookout.”

Mientrastanto, sa pag duda na sinalakat sinda, nagluluwas na nagkawarara an kadakol na bagay:  2 tablets (TM Rainbow Touch asin Huawei); 3 cell phones (Apple iPhone, Samsung asin Sony); Wi-fi gadget asin cash na cuartang P180,000.00.

Huli sa sumbong sa mga awtoridad, an pulis sa pamamayo ni Police Inspector Bienvinido Enciso, an hefe kan pulis sa Pasacao, an nag despachar nin sarong team, na masusug kan gira kan mga parahabon.

Naging madali sa mga awtoridad na masusug asin maaprehendir an mga suspechado, kan mismong itukdo kan complainant an saiyang mga naheling na persona na nagdudurulag hale sa saindang harong. Ini nangyari kan ipaheling ki Ilao an mga retrato kan mga pasaway na elementos kan comunidad, sa saray na retrato kan awtoridad.

Tulos nag gibo nin “hot pursuit operation” an mga police.

An sarong apod sa telephono an nagtukdo sa mga pulis kan tinatagoan kan mga parahabon. Ini sa sarong abandonadong harong sa Brgy. San Cirilo.

An nasambit na apod an nakapadali kan pagkadakop kan mga suspechado.

Kan mag positibo an lugar na saindang tinatagoan, dinakop kan mga pulis an mga suspechado. Sa ginibong “body search” sainda, si PO1 Nick Belbes, an duty investigator, nakakua kan mga minasunod: 2ng tablets (Rainbow Touch Mate asin Huawei); 3ng cellphones; 1ng Olympus digital camera; 1ng Smart Bro pocket Wi-Fi; 3ng cellphone charger; 3ng cell phone sim card; 2ng cell phone battery; 1ng student driver’s license ni Jonathan Galicia; 3ng one dollar bill; 1ng twenty peso bill; pitong mamiso;  1ng dies pesos; 1ng balisong;  4 na pitaka na may laog nin mga retrato ni Galicia; asin 1ng itom na bag.

Nakunfiscar man sa poder kan mga suspechado an mga ipinapangalad na druga asin drug paraphernalia: 2ng lighters; 12ng iba-ibang clase nin aluminum foil; asin sarong glass test tube.
Kaibahan pa digdi an dae silyadong pastic sachet nin “white crystalline substance,” na pig tutubodan na shabu.

Mientrastanto, kan darahon sa Camarines Sur Provincial Crime Laboratory an mga nakonfiscar na bagay, nag luluwas na confirmadong shabu manangad.

Si Kenneth Castillo asin Jerome Magtarayo, kan kuanan nin sample nin ihi, nagpositibo man sa shabu.
Share:

Featured Post

Red Cactus Resto Bar owner arrested in buy-bust

Red Cactus Bicol Standard file photo NAGA CITY (Bicol Standard) – A buy-bust operation in front of Red Cactus along Magsaysay Avenue,...