Saturday, January 18, 2014

Naga City, pwedeng maging isla?

ILLUSTRATION: BICOL STANDARD
An ciudad nin Naga pwedeng maging isla.

Ini an saro sa mga posibilidad kun mapadagos an mga makuring efecto kan pinag-aapod na climate change.

Segun ini sa sarong bagong pag-aadal na inaapod na "Business Risk Assessment and the Management of Climate Change Impacts."

Ini ginibo kan the World Wildlife Fund Philippines asin kan Bank of the Philippine Islands (BPI) Foundation.

An pagkusog asin pagdakol kan mga bagyo, an padagos na pag-imbong asin paglangkaw kan tubig sa dagat, asin an pagpadagos kan El Niño gabos pwedeng magcontribuir sa pagbabagong ini.

Alagad an numero unong pwedeng magkawsa kan pagiging isla kan ciudad nin Naga, iyo an lokasyon kaini, na kataid mismo kan Bicol River Basin.

Sinabi sa pag-aadal na an paglupay kan salog nin huli sa makusog na pag-uran iyo an pwedeng magdara nin grabeng pagbaha.

Dinagdag pa sa bareta na napapalibutan pa an Naga kan mga banwaan na harababa man, arog kan Nabua asin Milaor.

An Milaor ngani, segun sa pag-aadal, dating inaapod na Milaud, o May Laud, na boot sabihon, hababa asin parati man kun bahaon an lugar na ini.

Alagad kun sa ngapit na panahon mangyari man nanggad na maging isla an Naga, bako ini an magiging primerong beses.

Sinasabi sa mga record na kaidto, nakasuway naman an ciudad nin Naga sa mga pagtaraid kaining banwaan, nin huli man sa grabeng pagbaha.

Mientrastanto, naghurot and Worldwide Fund for Nature (WWF) Philippines asin Bank of the Philippine Islands (BPI) Foundation sa local na gobyerno na dai ipagpasipara sana an mga resulta kan pag-aadal.

En ves, dapat gamiton an mga nanudan na mga bagay digdi sa pagpaplano kan ciudad.

Nanotaran pa sa research na an Naga saro sa mga nasa pinakadakulang peligro sa nagkapirang ciudad kan Pilipinas na imbwelto sa pag-aadal.

Ini ikaduwa sana sa Tacloban City, na pinag-identificar na iyo an ciudad na pinaka-peligrosong maray kun pag-uurulayan an mga efecto kan climate change.

An iba pang mga ciudad na kabali sa pag-aadal iyo an Baguio, Cebu, Davao, Iloilo, Cagayan, Dagupan, Laoag, Zamboanga, Angeles, asin Batangas.
Share:

Featured Post

Bicol PNP nabs 2,701 in anti-illegal gambling ops

LEGAZPI CITY -- For the past three quarters covering the period from January-September this year, a total of 1,079 positive illegal gam...