Thursday, January 23, 2014

Pusher nin droga, dakop


by Oscar Esmenda

LIBMANAN, CSUR - Dinakop kan mga awtoridad, por medio nin search warrant na pig isyu ni RTC Judge Irma Isidora M. Boncodin- Zamudio, si Eduardo Vargas sa banwaan na ini, asin nakuanan nin shabu, asin mga gamit sa pag usar kaini.

Sa nagunong informasyon kan BICOL STANDARD, haloy nang pigbabantayan kan mga miembros kan Philippine National Police (PNP)  si Vargas, na suboot haloy nang pigtutubodan na imbuelto sa pagbariwas nin druga.

Sa bisa kan “search warrant,” sinakyada kan mga pulis an residencia ni Vargas, asin nakua sa saiyang poder an minasunod na bagay: (1) sarong color pulang laganan nin Selecta ice cream na may laog nin dagom , gunting, improvised forceps asin laogan na plastic para sa pag repack nin shabu; (2) sarong “heat sealed” na plastic sachet na may laog nin pig tutubodan na shabu, asin iba pang gamit.

Ipinahayag kan mga awtoridad na tulong (3) sachet kan pinag babawal na “shabu” an nakua sa poder kan suspechado.

Kabale sa grupo na nag conducer kan raid sa residencia kan suspechado iyo sinda P. Supt. Vicente Costales Marpuri, Jr., OIC sa Libmanan police station; an mga testigong si Domingo Guerrero, Jr., Eduardo Saliva, na representante kan media asin si Prosecutor Edred Dimabayao, representante kan DOJ.

Si Judge Zamudio an nag paluwas kan search warrant  na may numero 2014-04, para sa casong ini.
Mientrastanto, an banwaan na ini, saro sa nagkakapirang lugar sa Camarines Sur na sinasabing dakula an distribusyon kan ipinag babawal na druga.

Si Vargas, yaon pa ngonian sa poder kan mga awtoridad, mantang pighahanda an asunto criminal na isasangat contra saiya.

An pigtutubodan na shabu na nakua sa saiyang poder yaon na man sa Camarines Sur Provincial Crime Laboratory, para segurohon na shabu manangad ini.
Share:

Featured Post

Bicol PNP nabs 2,701 in anti-illegal gambling ops

LEGAZPI CITY -- For the past three quarters covering the period from January-September this year, a total of 1,079 positive illegal gam...