Wednesday, January 15, 2014

Election sa CASURECO II board, mayong kandidato

CASURECO II. (PHOTO: BICOL STANDARD)
CIUDAD NIN NAGA — Ultimong aldaw ngonian, fecha 15 kan bulan na Enero sa plantiar nin certificate of candidacy sa mga interesado na magdalagan sa mga nakatayang pwesto sa Camarines Sur Electric Cooperative (CASURECO) II. Alagad, mayo ni saro na interesado.

Ini an nagunong informasyon hale sa laog mismo kan oficina kasoodmang hapon.

Segun sa informante kan BICOL STANDARD, apisar kan dakul an mga nagmamawot na magtapsok sa nasambit na election sa mga miembros kan junta directiba, difisil suboot asin magabat an mga hinahagad na calificacion.

Iyo na ini an ikaduwang beses na gigibohon na basehan an bagong ley na pinanday kan Congreso mapadapit sa pagpili nin director kan cooperatiba.

Kan sarong taon, pirang beses na dae nadagos an pag-elihir nin mga director kan cooperatiba kan CASURECO ll.

An enot na schedule kinontra kan mga oficiales kan Ciudad Nin Naga asin sinuportaran man kan mga opisyales kan Capitolyo Provincial.

Kan sarong taon, liwat nang nagfuerza kuta an manehamiento na mag pa-election, pero mayo nin nag calificar.

Mientrastanto, maging an mga nakatukaw na oficiales kan cooperatiba ngonian an nag sabi na mayo maski saro sa sainda an macalificar.

An mga magagabat na kondisyones para tugotan na mag kandidato sa pag pili nin director kan cooperatiba iyo na dapat an kandidato graduado sa sarong apat na taon na curso sa colegio.

Kaipohan man na nakaatendir siya nin dae makulang sa duwang beses na Annual General Membership Meeting o (AMA); dapat mayong utang, o dae nagpalso sa pagbayad kan consumo sa kuryente sa laog nin limang taon.

An mga itinatayang mga distrito sa nakatalaan na pirilian iyo an Minalabac, Milaor, Pili, Canaman,
Calabanga, Tinambac, Siruma, asin Naga South District.

Huli kan siring na mga pangyayari, an mga miembros kan Junta Directiba, mayo pang karibay.
Share:

Featured Post

478 passengers stranded in Bicol ports due to 'Samuel'

PNA file photo LEGAZPI CITY -- The Philippine Coast Guard (PCG) in Bicol on Monday canceled the trips of sea vessels, grounding 478 pa...