Friday, January 24, 2014

Nagkandidatong gobernador sa CamSur, linangob sa carcel

Nagkandidatong gobernador sa CamSur, linangob sa carcel

CIUDAD NIN NAGA--Sarong kandidato sa kargong gobernador kan nagtalikod na eleksyon local sa provincia nin Camarines Sur an linangob sa carcel kan pulis sa ciudad na ini.

Si William Iliw iliw, 57 años, asin taga-Presentacion, an ipigreklamo nin sarong nagngangarang Niño Devisio na suboot napamoransangan na banogon mantang yaon sa sarong inuman sa Diversion Road digdi.

Si Iliw iliw maogmahon na marhay na nakipag-inoman sa duwang amigo kan siya maka-encontrada kan saro man na grupo na kaibahan ni Devisio.

An victima na si Devicio, na suboot babayote, nagdulok sa mga pulis na gatok-gatok an dungo asin nagtutururo an dugo sa saiyang bado.

An reklamo kan victima iyo na mantang siya asin an saiyang pag-iriba igwa man nin kaorogmahan sa parehong lugar, basang na sana siyang nakamate nin punete hale sa naging aspiranteng gobernador.

Sa ibong na lado, nagpahimutik si Iliw iliw kan mga sahot saiya.

Saiya pa ngani na sinabi na an totoong istorya iyo na siya an kinarigos nin suntok kan nagrereklamo.

Hinahalat kan mga autoridad ngonian kun baga sasangatan mananggad nin caso an 57 años na si Iliw iliw.

Mientrastanto, si Iliw iliw nagpamate nin grabeng hinanakit sa saiyang mga amigo asin kairiba sa club ta dai man lamang siya sinurog.

Sabi niya, pwedeng yaon kaya sa marhay na kamogtakan an duwang kairiba, o nasa VIP room, kan mangyari an insidente.

Si Iliw iliw kapurit sa limang kandidatong gobernador.
Share:

Featured Post

14ng pasahero sa jeep na nahulog sa Tinambac, salbado na

TINAMBAC, CSur - Binasol ni Municipal Councilor Jonas Soltes an Department of Public Works and Highways (DPWH) sa saindang kapabayaan n...