Tuesday, January 7, 2014

RTC Judge sa CSur, naghuma na kastigohon nin Contempt of Court an mga oficiales kan CASURECO 2


Pili, CSur – Sinugo ni Judge Marvel Clavecilla kan Branch 33 kan Regional Trial Court si Camarines Sur 2 Electric Cooperative General Manager Eddie A. Adlao, an gabos na area managers, mga department heads, gabos na miembros kan contractual disconnection team, mga tellers/cashiers, na pondohon an pag-implementar kan collection asin disconnection sa dugang na presyo kan kuryente poon Nobyembre hasta Deciembre, kan sarong taon, sagkod sa mga masunod na mga panahon, sakod na mayo pa nin bagong kasugoan an jusgado.

Sa order ni Judge Clavecilla, saiyang sinabi na an CASURECO 2, sa pag-implementar kan dugang na singil, hayag na naglapas sa injunction writ kan RTC.

Sabi ni Judge Clavecilla, an injuction na saiyang ipinaluwas nagpako sa P4.8932, an ipigtutugot na generation charge para sa total na P8.42 an kada Kilowatt hour.

Asin, bako suboot an pigki-kwestyon na P9.4788 para sa generation charge asin an kabaeng na kantidad para sa distribution charge, na malangkaw pa.

Iyan, suboot, “unconscionable, unjustifiable asin economically deplorable”.

Huli kan siring na bagay, an Corte, motu proprio, o, sa saiyang sadire, nagpaluwas kan “freeze order” contra sa CASURECO 2.

Ini, sa paagui kan mga nasambit na mga officiales kan cooperatiba, para pondohon an ginigibong pag implementar kan pigki-kwestyon na power rate increase.

An kasuguan, efectibo sa panahon na marecibe kan mga officiales kan cooperatiba an order.

Sinugo pa sinda kan jusgado na sa laog nin tulong (3ng) aldaw pagkarecibe kan order na ini, paisihon an jusgado.

Kun dae, sinda pwedeng kastiguhon nin contempt of court.

Siring man, si Judge Clavecilla, nagpaisi sa-gabos na mga consumedores nin kuryente kan CASURECO 2 asin sa mga “end users”, na nag bayad na kan enot na mga bulan, na mag hagad nin “rebate” o “refund”, sa ano man na sobrang ibinayad ninda.

Dugang pa sa order kan jusgado, pinangaladan an CASURECO 2 na mag-implementar nin penalidad sa mga nahuri sa pag bayad, afuera sana kun ini susug sa saiyang kasugoan, sinabi pa.

Ultimo, sinugo pa ni Judge Clavecilla an gabos na miembros kan junta directiba sa Pili, Calabanga, Tinambac, Milaor, Minalabac, asin Canaman mag paliwanag sa laog nin tulong (3ng) aldaw, pagkatapos na marecibe an kasuguan na ini, kun tano ta dae sinda dapat i-cite for contempt of court, huli kan dae pag sunod kan kasugoan.

Si Judge Clavecilla nagsugo pa ki OIC GM Adlao na paisihon an saiyang mga co-respondents mapadapit sa nasambit na kasuguan asin an summary hearing itinalaan sa fecha 9 ngonian na bulan, alas 2:00 nin hapon. Kun dae sinda mag-atendir, kakastigohon pa sinda nin indirect contempt of court, dugang pa kan juwes.

An order na ini ipinaluwas kan fecha 6 ngonian na bulan, sa Cadlan, Camarines Sur.

An casong ini, nagpoon kan pag plantiar nin caso sa Regional Trial Court sinda Genoviva Dimaiwat, Josephine Leonides asin Evangeline Laurente contra sa Casureco 2, na dati pinag representar ni OIC Manager Jane Barrameda asin an dating coop president na si Atty.Nixon Tabora, bilang respondents.
Share:

Featured Post

Red Cactus Resto Bar owner arrested in buy-bust

Red Cactus Bicol Standard file photo NAGA CITY (Bicol Standard) – A buy-bust operation in front of Red Cactus along Magsaysay Avenue,...