Thursday, December 5, 2013

Uda sulu, kurahaw kan mga taga Rinconada

Source
IRIGA CITY— Tagob nin kahaditan an mga residentes sa anom  na banwaan asin an ciudad na ini, sa provincial nin Camarines Sur na dae magkaigwa nin kuryente, sa halawig na panahon, huli sa kawaran nin cuartang pambayad sa moroso, sa consumo sa electricidad.
An Camarines Sur III Electric Cooperative, Inc., (CASURECO III) pirang aldaw nang pinutulan supply nin kuryente, alagad, mayong malinaw na senal na makakakomple kan dakulaon na obligasyon financial.
Sakop kan nasambit na cooperativa an mga banwaan kan Bula, Baao, Balatan, Bato, Nabua, Buhi, asin an ciudad nin Iriga.
Sa pakikihumapot kan BICOL STANDARD kasoodma, naaraman na an San Miguel Corporation, na iyo an supplier kan kuryente, nag sisingil nin kantidad P87 millones, abot sa bulan na Nobyembre.
Sa pinaluwas na informasyon, an SMEC nag hahagad nin kantidad P48 millones, tanganing maitakod an electricidad.
Mientrastanto, an cooperatiba nag lansar nin mahiwas na kampanya para makatipon nin cuarta, sa mga miembros consumedores, orog na an mga may morosong bayadan.
An Casureco III, enot kaini, nagpahayag man na igwa sinda nin dapat macollectang nag aabot sa kantidad P90 milliones, sa mga residential connections, asin P11 millones man sa mga street lights.
Mientrastanto, ako man kan mga officiales kan cooperatiba na dae sinda naging maigot sa pag singil sa mga may consumo nin electricidad. Ini an rason kun tano ta nag langkaw na maray an utang kan cooperatiba.
Kasoodma, an General Manager kan Casureco III nag pasiring duman sa Manila, para mag ngayo-ngayo sa National Electrification Administration (NEA) nganing matabangan sinda na kumbensiron an SMEC na itakod ngona an kuryente, mantang nag hahanap pa nin cuartang pambayad.
An mga consumedores kan electricidad nag babasol ngonian sa mga officiales kan cooperatiba, kabale na an man laen-laen na local na gobierno,na igwa man nin mga babayadan sa kuryente.
Enot kaini, an mga lideres local kan anom na banwaan sa Rinconada Area, asin an ciudad na ini, sa presensya kan saindang deputado sa distrito an nag kaigwa nan in pag oorolay dapit sa problema. Alagad, arog kan dati, kulang man an nag tubod sa napag-orolayan.
Share:

Featured Post

Hundreds of public servant hopefuls join Albay CSC fair

JOB FAIR. Hundreds of city residents seeking employment flock to the two-day ‘Government Job Fair’ conducted by the Civil Service Commiss...