Thursday, December 26, 2013

PD Senior Supt. Bausa sa mga pulis: dai magsinutil

Source
PILI, CSUR—Nagpatanid si Police Senior Supt. Ramiro Bausa sa gabos na mga miembro kan PNP na saiyang sisibakon sa servicio an mga masinutil asin mapaputok nin badil ngonian na Pasko asin Bagong Taon.
Sa saiyang ginibo na pagtaram kan sarong aldaw sa flag raising ceremony sa laog kan PNP provincial command, sinabi ni Bausa na dai siya maduwa-duwa asin mayo nin sasantohon sa saiyang pagpaotob kan kasuguan kan higher headquarter.
Magigiromdoman na enot na mga aldaw pa sana kan Disyembre, igwa na nin direktiba an pamayo kan PNP sa Pilipinas na si PNP Director Allan Purisima na nagbabawal sa mga tauhan kan PNP na maggamit kan badil asin magpaputok sa Pasko asin Bagong Taon.
Pagkatapos kan saiyang pagtaram, si Bausa, nagpasiring duman sa oficina regional kan PNP kun sain nagkaigwa nin command conference asin kaparehas na issue an pinag-tocar.
May kasuguan si Police Chief Supt. Victor Deona na higotan an pag-mato sa mga pulis tanganing dai man magkaigwa nin maski ano man na remalaso asin aksidente sa Pasko asin Bagong Taon.
Mientrastanto, sa provincia nin Camarines Norte, ginibo naman kan sarong aldaw an paglaag nin selyo sa mga badil tanganing an mga ini dai gamiton kan mga miembro kan Camarines Norte Police Provincial Office asin mga municipal police station ngonian na Pasko asin Bagong Taon. Ini man sosog sa direktiba ni Purisima.
Maroromdoman na sa mga nakaaging taon, an naging causa man sana kan nagkapirang aksidente sa manlaen-laen na parte kan nasyon, iyo an pagpaputok kan badil kan mga pasaway na miembro kan PNP.
Share:

Featured Post

Bicol employers reminded to give 13th month pay on time

LEGAZPI CITY - The Department of Labor and Employment (DOLE) RO V reminded employers to pay the 13th month pay of their workers on time a...