Doktor, hinold-up


ni Oscar Esmenda

GOA, CSUR— Sarong lalaki an victima na naman kan nagdadakol na kaso nin holdup igdi sa provincia.
An lalaki, binistong si Bobby Felipe, 51 años, sarong doktor asin residente kan San Juan Evangelista, Centro Poblacion sa banwaan na ini.
Si Felipe nagmamaneho pasiring sa ciudad nin Naga kan siya magpundo sa gilid kan tinampo. Duwang lalaki na dai pa namimidbid an tulos nagrani sa victima asin tinutukan siya nin badil asin nagdeklarar na sinda nangangaipo sana nin kwarta.
Linaog kan duwang suspetsado an auto kan victima asin kinua an saiyang bag na may P20,000, $5,000, pasaporte, immigrant VISA, VISA pocket, Lenovo laptop,  duwang cellphone, asin wallet na may kantidad 500 pesos.
Segun ki Felipe, an mga suspetsado nakasulot nin helmet na natahuban an saindang lalawgon. Nagdulag an mga nang-holdup pasiring sa direksyon kan Pili, sa provinciang ini.
Pinag-aadalan pa kan mga autoridad an  insidente, tanganing maaprehender an mga  suspetsado.
Powered by Blogger.